శ్రీ నారా చంద్రబాబు నాయుడు గారి జీవిత చరిత్ర | Biography of Sri Nara Chandrababu Naidu-2024
Biography of Sri Nara Chandrababu Naidu-2024: నారా చంద్రబాబు నాయుడు(Nara Chandrababu Naidu) భారతీయ రాజకీయ నాయకుడు, ఉమ్మడి ఆంధ్రప్రదేశ్ రాష్ట్రానికి 13వ ముఖ్యమంత్రి. అతను తెలంగాణ ప్రత్యేక రాష్ట్రం గా విడిపోయిన తరువాత ఆంధ్రప్రదేశ్ (నవ్యాంధ్ర) రాష్ట్రానికి మొదటి ముఖ్యమంత్రి (2014-2019). విభజనకు ముందు 1994 నుండి 2004 వరకు ఉమ్మడి ఆంధ్రప్రదేశ్ రాష్ట్ర ముఖ్యమంత్రిగా పనిచేసాడు. 2004 నుండి 2014 వరకు ఆంధ్ర ప్రదేశ్ రాష్ట్ర శాసనసభలో ప్రతిపక్ష నాయకునిగా ఉన్నాడు. అతను ప్రస్తుతం తెలుగుదేశం పార్టీకి జాతీయ అధ్యక్షునిగా వ్యవహరిస్తున్నాడు. అతను ఇండియా టుడే నుండి “ఐ.టి ఇండియన్ ఆఫ్ ద మిలీనియం”, ద ఎకనమిక్ టైమ్స్ నుండి “బిజినెస్ పర్సన్ ఆఫ్ ద యియర్”, టైమ్స్ ఆసియా నుండి “సౌత్ అసియన్ ఆఫ్ ద యియర్”, ప్రపంచ ఎకనమిక్స్ ఫోరం డ్రీమ్‌ క్యాబినెట్ లో సభ్యుడు వంటి పురస్కారాలతో పాటు అనేక పురస్కారాలు పొందాడు. అతను ఆంధ్ర ప్రదేశ్ రాష్ట్ర రాజకీయాలలోనే కాకుండా భారతదేశ రాజకీయాలలో ప్రముఖ పాత్ర వహిస్తున్నాడు.
Biography of Sri Nara Chandrababu Naidu-2024
నారా చంద్రబాబు నాయుడు గారి గురించి దేశ ప్రజల్లో ఉన్న అభిప్రాయాలివి. చంద్రబాబు గారి గురించి ఒక్కమాటలో చెప్పాలంటే.. ‘ఉత్తమ ఆర్థిక విధానాలతో ఉత్తమ పాలన అందించడమే ఉత్తమ రాజకీయం’ అని నమ్మిన మొదటి భారతీయ రాజకీయ నాయకుడు.
రాజకీయనాయకులలో ఐటీ జ్ఞానిగా అభివర్ణించబడే చంద్రబాబు నాయుడు, ఈ-గవర్నెన్స్ ను ప్రజలకు పరిచయం చేసారు. ఎలక్ట్రానిక్స్ & మ్యానుఫ్యాక్చరింగ్ వంటి రంగాలను ప్రోత్సహించి విద్య, ఆరోగ్య, మౌలిక, ఆర్థిక, పాలనా రంగాలలో సాంకేతికతను చొప్పించారు. ఈ క్రమంలో ఒక్క భారతదేశం లోనే కాదు ప్రపంచవ్యాప్తంగా ప్రముఖుల దృష్టిని ఆయన ఆకర్షించారు.
ఉమ్మడి ఆంధ్రప్రదేశ్ ముఖ్యమంత్రిగా పనిచేస్తున్న కాలంలో.. 1998లో అమెరికాలోని ఇల్లినాయిస్ గవర్నర్ జిమ్ ఎడ్గార్ చంద్రబాబు గౌరవార్ధం సెప్టెంబర్ 24వ తేదీని ‘నాయుడు డే’గా ప్రకటించారంటే ఆయన విజన్ ఏంటో అర్థం చేసుకోవచ్చు. ఇండియా టుడే వార్తా సంస్థ చంద్రబాబును ‘ఐటీ ఇండియన్ ఆఫ్ ది మిలీనియం’ గా పేర్కొంది. ఎకనామిక్ టైం వార్తా సంస్థ ‘బిజినెస్ పర్సన్ ఆఫ్ ది ఇయర్’ అన్నది. టైమ్ ఆసియా సంస్థ “సౌత్ ఏషియన్ ఆఫ్ ది ఇయర్” అన్నది. అమెరికాకు చెందిన ఒరాకిల్ కార్పొరేషన్ ప్రచురించే మాస పత్రిక ‘ప్రాఫిట్’ చంద్రబాబును ‘హిడెన్ సెవెన్ వర్కింగ్ వండర్స్ లో ఒకరు’ అని వర్ణించింది.
బీబీసీ చేత ‘సైబర్ సావీ చీఫ్ మినిస్టర్’ అనిపించుకుంటే, సిఎన్ఎన్ వార్త సంస్థ “సీఈఓ ఆఫ్ ఆంధ్రప్రదేశ్” అన్నది. బ్రిటన్ మాజీ ప్రధాని టోనీ బ్లెయిర్, ఐక్యరాజ్యసమితి మాజీ ప్రధాన కార్యదర్శి కోఫీ అన్నన్, అమెరికా మాజీ అధ్యక్షుడు బిల్ క్లింటన్, సింగపూర్ మాజీ ప్రధాని గో చోక్ టోంగ్.. తదితరులు భారతదేశానికి వచ్చినప్పుడు తమ షెడ్యూల్ లో ఆంధ్రప్రదేశ్ కు వచ్చి చంద్రబాబు నాయుడుతో సమావేశమవడాన్ని తప్పనిసరి చేసుకున్నారంటే చంద్రబాబు విశిష్టత ఏంటో అర్థం చేసుకోవచ్చు. ఇక ప్రపంచ దిగ్గజ సంస్థ మైక్రోసాఫ్ట్ అధినేత, బిల్ గేట్స్ తో చంద్రబాబునాయుడుకు ఉన్న అనుబంధం గురించి అందరికీ తెలుసు.
ఎన్టీఆర్(NTR) తెలుగుజాతికి ప్రపంచ ఖ్యాతి తీసుకువస్తే, చంద్రబాబునాయుడు తెలుగువారి ప్రతిభను ప్రపంచ నలుమూలలకు పరిచయం చేసారు. ప్రపంచ పటంలో తెలుగు నేలకు ఒక గుర్తింపునిచ్చారు. ఉమ్మడి ఆంధ్రప్రదేశ్ ముఖ్యమంత్రిగా, నవ్యాంధ్ర ముఖ్యమంత్రిగా సంక్షేమాన్ని, అభివృద్ధిని రెండు చేతులా ప్రజలకు అందించారు. విద్యుత్, ఆర్థిక సంస్కరణలతో దేశానికే దిశానిర్దేశం చేసారు. చంద్రబాబు పాలన అంటే పరిశ్రమలు పరుగెత్తుకుంటూ వస్తాయి. ‘బాబుతోనే జాబు’ అన్నది యువత నమ్మకం. సంపద సృష్టి అన్న దాన్ని పాలనలో ప్రవేశపెట్టిన మేధావి చంద్రబాబునాయుడు.
తెలుగుదేశం పార్టీ అధినేతగా దేశ రాజకీయాల్లో చంద్రబాబునాయుడు పోషించిన పాత్ర దేశ చరిత్రలో ముఖ్య అధ్యాయం అని చెప్పవచ్చు. రెండు కేంద్ర ప్రభుత్వాల ఏర్పాటులో, ముగ్గురు ప్రధానుల ఎంపికలో, ఇద్దరు రాష్ట్రపతుల ఎంపికలో చంద్రబాబు పాత్ర అత్యంత కీలకంగా నిలిచింది. అధికారంలో ఉన్నా, ప్రతిపక్షంలో ఉన్నా ప్రజానాయకులలో ‘ది బాస్’ అంటే చంద్రబాబునాయుడే.
నారా చంద్రబాబు నాయుడు వ్యక్తిగత జీవితం
| పూర్తి పేరు | నారా చంద్రబాబు నాయుడు |
| పుట్టిన తేదీ | 20 Apr 1950 (వ‌య‌స్సు 73) |
| పుట్టిన ప్రాంతం | చిత్తూరు, ఆంధ్రప్రదేశ్ |
| పార్టీ పేరు | Telugudesam Party |
| విద్య | Post Graduate |
| వృత్తి | రాజకీయ నాయకుడు |
| తండ్రి పేరు | ఎన్. ఖర్జూర నాయుడు |
| తల్లి పేరు | అమ్మణ్ణమ్మ |
| జీవిత భాగస్వామి పేరు | నారా భువనేశ్వరి |
| జీవిత భాగస్వామి వృత్తి | వ్యాపారం |
| సంతానం | 1 కుమారులు |
| శాశ్వత చిరునామా | ప్లాట్ నెం. 1310, రోడ్ నెం. 65, జూబ్లీ హిల్స్, హైదరాబాద్ – 500033 |
| ప్రస్తుత చిరునామా | అమరావతి, ఆంధ్రప్రదేశ్ |
నారా చంద్రబాబునాయుడు, ఎన్.టి.రామారావు(NTR) కూతురు నందమూరి భువనేశ్వరిని పెళ్ళిచేసుకొని నందమూరి కుటుంబంలో భాగమయ్యాడు. ఈయన ఏకైక సంతానం, కుమారుడు నారా లోకేశ్ కు నందమూరి బాలకృష్ణ పెద్ద కుమార్తె బ్రాహ్మణి తో వివాహం చేసి నందమూరి కుటుంబంతో మరింత అనుబంధం పెంచుకున్నాడు. వీరి కుమారుడు దేవాన్ష్.
తెలుగుదేశంపార్టీ(TDP)
నందమూరి తారక రామారావు(NTR) తెలుగుదేశం పార్టీని 1982, మార్చి 29న ప్రారంభించాడు. అప్పటివరకు రాష్ట్రాన్ని ఏకపక్షముగా పాలిస్తున్న కాంగ్రేసు పార్టీకి ప్రత్యమ్నాయముగా ఒక ప్రాంతీయ పార్టీ ఉండాలనే ఆశయముతో స్థాపించాడు. ఎన్.టి.ఆర్ రాజకీయ పార్టీ తెలుగుదేశం పార్టీ స్థాపించినప్పటికీ చంద్రబాబు నాయుడు అందులో చేరలేదు. పార్టీ అదేశిస్తే మామపై పోటీకి సిద్దం అంటూ ప్రకటించి, అందరినీ ఆశ్చర్యపరచాడు.
1983 అసెంబ్లీ ఎన్నికలలో తెలుగు దేశం పార్టీ(TDP) ఆంధ్రప్రదేశ్ శాసనసభలో అద్యధిక సీట్లు కైవసం చేసుకుంది. పార్టీ పెట్టిన 9 నెలలలోనే ప్రభుత్వాన్ని ఏర్పాటుచేసి తెలుగుదేశం పార్టీ అందరినీ ఆశ్చర్యపరచింది. చంద్రగిరి నియోజకవర్గంలో కాంగ్రెస్ అభ్యర్థిగా చంద్రబాబునాయుడు తెలుగుదేశం పార్టీ అభ్యర్థి మేడసాని వెంకట్రామనాయుడు చేతిలో ఓటమి పాలయ్యాడు. తరువాత అతను తెలుగు దేశం పార్టీ(TDP)లో చేరాడు. తరువాతి కాలంలో తెలుగుదేశం పార్టీలో రాజకీయంగా ఉన్నతస్థాయికి ఎదిగి పలు సంచలనాలకు కేంద్రబిందువయ్యాడు. 1985 వరకు తెలుగుదేశం ప్రధాన కార్యదర్శిగా పార్టీ యంత్రాంగాన్ని పటిష్ఠం చేశాడు.
పార్టీలో ఎదుగుదల
1984లో ఎన్టీఆర్(NTR) గుండె చికిత్స కోసం అమెరికాకు వెళ్లినప్పుడు నాదెండ్ల భాస్కరరావు కాంగ్రెస్‌తో చేతులు కలిపి కొంత మంది శాసనసభ్యులను తనవైపు తిప్పుకొని అడ్డదారిలో అధికారాన్ని చేజిక్కించుకొన్నారు. ఈ ఉపద్రవాన్ని తిప్పికొట్టడానికి చంద్రబాబు రంగప్రవేశం చేశాడు. 1984 ఆగస్టు 16న నాదెండ్ల భాస్కరరావు, తన మద్దతుదారులతో పాటు అప్పటి రాష్ట్ర గవర్నరైన రాంలాల్ ని కలిసి పార్టీలో రామారావు మద్దతు కోల్పోయాడని, పార్టీ మద్దతు తనకే ఉన్నదని ప్రధానమంత్రి ఇందిరా గాంధీ లోపాయికారీ సహకారంతో ముఖ్యమంత్రి అయ్యాడు. గవర్నర్ అతనికి అసెంబ్లీలో మద్దతు నిరూపించుకోవడానికి నెల రోజులు గడువిచ్చాడు. ఆ సందర్భంలో చంద్రబాబునాయుడు తెలుగు దేశంపార్టీ(TDP) శాసన సభ్యులతో భారత రాష్ట్రపతి ఎదుట పెరేడ్ నిర్వహించి రాజకీయ నైపుణ్యాన్ని ప్రదర్శించాడు. భాస్కరరావు శాసనసభలో మద్దతు కూడగట్టుకోలేకపోయాడు.
ఫలితంగా సెప్టెంబరు 16న భాస్కరరావు ముఖ్యమంత్రిగా వైదొలిగాడు. 31 రోజుల అనంతరం రామారావు తిరిగి ముఖ్యమంత్రి పదవిని అధిష్టించాడు. తన అల్లుడు చేసిన యుక్తికి ఆకర్షితుడైన రామారావు, చంద్రబాబునాయుడుని తెలుగుదేశం పార్టీ ప్రధాన కార్యదర్శి పదవిని ఇచ్చాడు. భాస్కరరావు తిరుగుబాటు యత్నం తరువాత చంద్రబాబు తెలుగు దేశం పార్టీ(TDP)లో ముఖ్యమైన పాత్రను పోషించాడు. అప్పుడు ఎన్.టి.రామారావు ముఖ్యమంత్రిగా ప్రమాణస్వీకారం చేశాడు. అప్పుడు జరిగిన ఎన్నికలలో కుప్పం నుండి ఎన్నికై ప్రభుత్వంలో ఆర్థిక, రెవెన్యూ శాఖల మంత్రిగా చంద్రబాబు నాయుడు పనిచేసాడు. 1989 ఎన్నికలలో పార్టీకి ప్రభుత్వం ఏర్పాటుచేయడానికి తగినంత మెజారిటీ లేక పోవడంతో, ప్రతిపక్ష హోదాతో శాసన సభలో అడుగుపెట్టనని ఎన్టీఆర్(NTR) ప్రకటించడంతో, నాయుడు శాసనసభలో తెలుగుదేశం తరుపున ప్రతిపక్షనాయకునిగా వ్యవరించాడు.
1994 ఎన్నికలలో తెలుగుదేశం పార్టీ మళ్ళీ విజయం సాధించి ఎన్టీరామారావు ముఖ్యమంత్రి అయ్యాడు. తెలుగుదేశం పార్టీలో ఎన్.టి.ఆర్ భార్య లక్ష్మీ పార్వతి జోక్యం పెరగడంతో పార్టీ వ్యవస్థాపకుడైన మామపై తిరుగుబాటు చేసాడు. తెలుగు దేశం(TDP) శాసన సభ్యుల మద్దతును కూడగట్టుకొని ఎన్టీఆర్(NTR) ను అధికారం నుంచి దించి అతను 1995 సెప్టెంబరు 1న ముఖ్యమంత్రి పీఠం ఎక్కాడు. 160 మంది ఎమ్మెల్యేలు ఎన్టీఆర్(NTRపై అవిశ్వాసం ప్రకటించడంతో ఆయన స్థానంలో చంద్రబాబు నాయుడు ముఖ్యమంత్రి అయ్యాడు. అతని రాజకీయ చాతుర్యం దేశ రాజకీయాలలోనే సంచలనం కలిగించింది.
నారా చంద్రబాబు నాయుడు జీవిత విశేషాలు-విజయాలు – Nara Chandrababu Naidu Achievements:
- 1950, ఏప్రిల్ 20 – చిత్తూరు జిల్లా, నారావారి పల్లెలో శ్రీ ఖర్జూర నాయుడు, శ్రీమతి అమ్మణ్ణమ్మ దంపతులకు నారా చంద్రబాబు నాయుడు జన్మించారు.
- పొరుగు గ్రామమైన శేషాపురంలో ప్రాథమిక విద్యాభ్యాసం. చంద్రగిరిలోని జిల్లా పరిషత్ పాఠశాలలో ఉన్నత పాఠశాల విద్యాభ్యాసం.
- 1972 – శ్రీ వెంకటేశ్వర విశ్వవిద్యాలయం నుండి బి.ఏ. ఉత్తీర్ణత.
- 1974 – ఆర్థిక శాస్త్రంలో పోస్ట్ గ్రాడ్యుయేషన్ (ఎమ్.ఏ. ఎకనామిక్స్).
- 1977 – పులిచెర్ల యూత్ కాంగ్రెస్ ప్రెసిడెంట్ గా నియామకం.
- 1978 ఫిబ్రవరి 25 – చంద్రగిరి నియోజకవర్గం నుంచి ఎమ్మెల్యేగా పోటీ.
- 1978 ఫిబ్రవరి 27 – ప్రత్యర్థి పట్టాభిరామ చౌదరి పై 2494 ఓట్ల మెజారిటీతో విజయం.
- 1978 మార్చి 15 – ఎమ్మెల్యేగా తొలిసారి ప్రమాణస్వీకారం.
- 1980 అక్టోబర్ 11 – ఆంధ్రప్రదేశ్ రాష్ట్ర చలనచిత్ర పరిశ్రమ, పురావస్తు శాఖల మంత్రిగా బాధ్యతలు.
- 1981, సెప్టెంబర్ 10, గురువారం, ఉదయం గం.8:06 ని.లకు… మద్రాసులో ఎన్టీఆర్(NTR) కుమార్తె భువనేశ్వరి గారితో వివాహం.
- 1983 జనవరి 23 – ఎన్టీఆర్(NTR) మొదటిసారి ముఖ్యమంత్రి అయిన రెండు వారాలకు చంద్రబాబు దంపతులకు పుత్రోదయం. నారా లోకేష్ జననం.
- 1984 మే 27 – తెలుగుదేశం పార్టీలో చేరిక.
- 1984 ఆగస్టు – సెప్టెంబర్ కేంద్ర కుతంత్రంతో అధికారం కోల్పోయిన ఎన్టీఆర్(NTR) కు మద్దతుగా ఎమ్మెల్యేలను కూడగట్టి బల నిరూపణ చేయించిన చంద్రబాబు.
- 1984 – ఎన్టీఆర్(NTR) ప్రభుత్వంలో కర్షక పరిషత్ చైర్మన్ గా నియామకం
- 1985 – తెలుగుదేశం పార్టీ ప్రధాన కార్యదర్శిగా నియామకం
- 1985 మార్చి 5 – మధ్యంతర ఎన్నికల్లో ఎమ్మెల్యేగా పోటీ చేయకుండా తెలుగుదేశం పార్టీ విజయంలో కీలకపాత్ర
- 1989 డిసెంబర్ 15 – ఆంధ్రప్రదేశ్ శాసనసభ ఎన్నికల్లో తెలుగుదేశం పార్టీ అభ్యర్థిగా కుప్పం నియోజకవర్గం నుంచి గెలుపు.
- 1989 – ఆంధ్రప్రదేశ్ శాసనసభలో తెలుగుదేశం పార్టీ తరపున ప్రతిపక్ష నాయకునిగా చంద్రబాబుకు బాధ్యతలు ఇచ్చిన ఎన్టీఆర్(NTR).
- 1992 – హెరిటేజ్ ఫుడ్స్ లిమిటెడ్ స్థాపన.
- 1994 డిసెంబర్ 12 – ఏపీ అసెంబ్లీ ఎన్నికల్లో తెలుగుదేశం పార్టీ ఘన విజయం సాధించిన తరువాత… ఎన్టీఆర్(NTR) మంత్రివర్గంలో రాష్ట్ర రెవెన్యూ, పునరావాస, ఆర్థిక, ప్రణాళిక, చిన్న మొత్తాల పొదుపు మరియు లాటరీల శాఖలకు మంత్రిగా బాధ్యతలు చేపట్టిన చంద్రబాబు.
- 1995 ఆగస్టు 23 – కుట్రదారుల నుండి తెలుగుదేశం పార్టీని కాపాడిన చంద్రబాబు.
ఉమ్మడి ఆంధ్రప్రదేశ్ కు సంచలన ముఖ్యమంత్రి:
- 1995 సెప్టెంబర్ 1 – ఆంధ్రప్రదేశ్ ముఖ్యమంత్రిగా ప్రమాణ స్వీకారం.
- 1995 నవంబర్ 1 – ‘ప్రజల వద్దకు పాలన’ ప్రారంభం.
- 1996 లోక్‌సభ ఎన్నికలు – కేంద్రంలో మొదటిసారి కాంగ్రెస్, బీజేపీలు లేని తృతీయ ఫ్రంట్ (యునైటెడ్ ఫ్రంట్) చైర్ పర్సన్ గా ఎన్నికైన చంద్రబాబు.
- 1996 జూన్ 1 – హెచ్ డి దేవెగౌడను ప్రధాని చేయడంలో చంద్రబాబు కీలకపాత్ర.
- 1996 – విద్య ఉద్యోగాల్లో మహిళలకు 33.33% రిజర్వేషన్.
- 1997 జనవరి 1 – శ్రమదానం, ప్రజల వద్దకు పాలన, మైక్రో లెవెల్ ప్లానింగ్ లక్ష్యాలుగా ‘జన్మభూమి’ కార్యక్రమం ప్రారంభం.
- 1997 మార్చి 13 – బీసీ కమిషన్ ఏర్పాటు. స్థానిక సంస్థల్లో బీసీలకు 33 శాతం రిజర్వేషన్లు.
- 1997 మార్చి – మైక్రోసాఫ్ట్ వ్యవస్థాపకులలో ఒకరైన బిల్ గేట్స్ తో మొదటిసారిగా చంద్రబాబు భేటీ. ఆంధ్రప్రదేశ్ లో మైక్రోసాఫ్ట్ సంస్థ కార్యాలయ ఏర్పాటుకు బిల్ గేట్స్ అంగీకారం.
- 1997 ఏప్రిల్ 21 – దేశప్రధానిగా ఇంద్ర కుమార్ గుజ్రాల్… చంద్రబాబు కీలకపాత్ర.
- 1997 జూలై 25 – దేశాధ్యక్షునిగా కె.ఆర్. నారాయణన్ ప్రమాణ స్వీకారం. దేశానికి తొలి దళిత అధ్యక్షుని ఎంపికలో చంద్రబాబు ముఖ్యపాత్ర.
- 1997 నవంబర్ 22 – పాలస్తీనా అధ్యక్షుడు యాసర్ అరాఫత్ తో చంద్రబాబు సమావేశం.
- 1997 – విజన్ 2020 డాక్యూమెంట్ తయారీకి 14 టాస్క్ ఫోర్స్ లను ఏర్పాటు చేసిన చంద్రబాబు.
- 1998 మార్చి 19 – చంద్రబాబు జాతీయ కన్వీనర్ గా ఎన్.డి.ఏ ఏర్పాటు. దేశప్రధానిగా అటల్ బిహారీ వాజపేయి.
- 1998 మార్చి 24 – దేశానికి తొలి దళిత స్పీకర్ ను ప్రతిపాదించిన చంద్రబాబు. 12వ లోక్ సభ స్పీకర్ గా జి.ఎం.సి. బాలయోగి బాధ్యతల స్వీకరణ. 1999 అక్టోబర్ 22న రెండోసారి కూడా 13వ లోక్ సభ స్పీకర్ గా ఎన్నికైన బాలయోగి.
- 1998 సెప్టెంబర్ 10 – ‘పచ్చదనం–-పరిశుభ్రత’ కార్యక్రమం ప్రారంభం.
- 1998 నవంబర్ 22 – ప్రధాని వాజపేయి చేతుల మీదుగా హైటెక్ సిటీ సైబర్ టవర్స్ ప్రారంభోత్సవం.
- 1998-99 – డ్వాక్రా పథకం కింద 2.93 లక్షల స్వయం సహాయక సంఘాల ఏర్పాటు.
- 1999 జనవరి 26 – రైతుబజార్ల ప్రారంభోత్సవం.
- 1999 జనవరి 26 – విజన్ 2020 పేరిట డాక్యుమెంట్ ను విడుదల చేసిన చంద్రబాబు.
- 1999 ఫిబ్రవరి 28 – హైదరాబాద్ లో మైక్రోసాఫ్ట్ డెవలప్మెంట్ సెంటర్ ను ప్రారంభించిన బిల్ గేట్స్.
- 1999 జులై 9 – నిరుపేద మహిళలకు కట్టెల పొయ్యి బాధలను తప్పించి గ్యాస్ పొయ్యి ఇచ్చిన ‘దీపం’ పథకం ప్రారంభం. 10 లక్షల గ్యాస్ కనెక్షన్లు ఇవ్వడం ఒక చరిత్ర.
- 1999 – హైదరాబాద్ లో జీనోమ్ వ్యాలీ ఏర్పాటు. ప్రపంచానికి కరోనా టీకాను అందించిన భారత్ బయోటెక్ సంస్థ ఇక్కడిదే.
- 1999 అక్టోబర్ 25 – చంద్రబాబు అధ్యక్షతన స్వర్ణాంధ్రప్రదేశ్ నినాదంతో ఆంధ్రప్రదేశ్ శాసనసభ ఎన్నికల్లో తెలుగుదేశం పార్టీ ఘన విజయం.
- 1999 అక్టోబర్ – భారత పార్లమెంటు ఎన్నికల్లో సైతం తెలుగుదేశం విజయబావుటా. ఎన్.డి.ఏ. సంకీర్ణ ప్రభుత్వానికి బయట నుంచి మద్దతు.
- 1999 నవంబర్ 11 – ఆంధ్రప్రదేశ్ రాష్ట్ర శాసనసభకు మొట్టమొదటి మహిళా అధ్యక్షురాలిగా, తొలి దళిత స్పీకర్ గా కావలి ప్రతిభా భారతి ఎంపిక.
- 1999 డిసెంబర్ – చంద్రబాబుకు ‘సౌత్ ఆసియన్ ఆఫ్ ది ఇయర్ 1999’ అవార్డు.
- 2000 జనవరి 9 – ఇండియా టుడే తదితర సంస్థల పోలింగ్ లో 11,016 ఓట్లతో ‘ఐటీ ఇండియన్ ఆఫ్ ది మిలీనియం’గా చంద్రబాబు నాయుడు ఎంపిక.
- 2000 జనవరి 26 – సిటిజెన్ చార్టర్ ఆఫ్ HMWSSB ఏర్పాటు. దేశంలో తొలిసారి.
- 2000 మార్చి 24 – ఆంధ్రప్రదేశ్ లో అమెరికా అధ్యక్షుడు బిల్ క్లింటన్ పర్యటన.
- 2000 ఏప్రిల్ – జల సంరక్షణ కోసం ‘నీరు-మీరు’ కార్యక్రమం ప్రారంభం.
- 2001 మార్చి 17 – ఐక్య రాజ్య సమితి ప్రధాన కార్యదర్శి కోఫీ అన్నన్ ఆంధ్రప్రదేశ్ పర్యటన.
- 2001 మార్చి 23 జస్టిస్ కె.పున్నయ్య నేతృత్వంలో ఎస్సీ, ఎస్టీ కమిషన్ ఏర్పాటు.
- 2001 – ప్రజలకు e-పరిపాలన అందించేందుకు 160 సేవలతో 200 e-సేవా కేంద్రాల ఏర్పాటు. 1999లో కేవలం 6 సేవలతో ఒకే ఒక కేంద్రాన్ని ప్రయోగాత్మకంగా ప్రారంభించారు.
- 2001 జులై 1 – విద్య, ఉద్యోగాల్లో బీసీలకు రిజర్వేషన్లు.
- 2001 డిసెంబర్ 2 – ప్రధాని వాజపేయి చేతుల మీదుగా హైదరాబాద్ లో ఇండియన్ స్కూల్ ఆఫ్ బిజినెస్ (ISB) ప్రారంభం.
- 2002 జనవరి 6 – ఆంధ్రప్రదేశ్ లోని వట్టెం గ్రామంలో బ్రిటన్ ప్రధాని టోనీ బ్లెర్ దంపతులతో పలు కార్యక్రమాల్లో పాల్గొన్న చంద్రబాబు.
- 2002 జూలై 25 – భారత రాష్ట్రపతిగా అబ్దుల్ కలాం బాధ్యతల స్వీకరణ. అబ్దుల్ కలాం పేరును ప్రతిపాదించి అటు ఎన్.డి.ఏ ప్రభుత్వాన్ని ఇటు కలాంను ఇద్దరినీ ఒప్పించిన చంద్రబాబు.
- 2002 డిసెంబర్ 13 – ఆంధ్రప్రదేశ్ లో 32వ జాతీయ క్రీడల నిర్వహణ.
- 2003 జూన్ 26 – ప్రజాస్వామ్యంలో ఇన్ఫర్మేషన్, కమ్యూనికేషన్ టెక్నాలజీ, ఈ- పరిపాలన అంశాలపై ఐక్యరాజ్యసమితిలో చంద్రబాబు ప్రసంగం.
- 2003 ఆగస్టు 9 – భారత ఉప ప్రధాని ఎల్.కె. అద్వానీ చేతుల మీదుగా ఎం.ఎం.టి.ఎస్. హైదరాబాద్ – మొదటి దశ జాతికి అంకితం.
- 2003 – శంషాబాద్ విమాశ్రయ నిర్మాణం కోసం ‘హైదరాబాద్ ఎయిర్పోర్ట్ డెవలప్మెంట్ అథారిటీ’కి 5,495 ఎకరాల భూమి కేటాయింపు.
- 2003 అక్టోబర్ 1 – తిరుపతిలో అలిపిరి వద్ద చంద్రబాబు పై హత్యాయత్నం.
- 2003 అక్టోబర్ 24 – ఆంధ్రప్రదేశ్ లో మొదటి ఆఫ్రో- ఆసియన్ గేమ్స్ నిర్వహణ.
- 2004 మే 11 – ఆంధ్రప్రదేశ్ లో అధికారాన్ని కోల్పోయిన తెలుగుదేశం పార్టీ.
ప్రతిపక్ష నేతగా ప్రజా పోరాటాలు :
- 2008 ఫిబ్రవరి 27 – యూపీఏ ప్రభుత్వం అనుసరిస్తోన్న రైతు వ్యతిరేక విధానాలకు నిరసనగా న్యూ ఢిల్లీలో జాతీయ నాయకులతో కలిసి కిసాన్ ర్యాలీ.
- 2010 జూలై 16 – మహారాష్ట్ర నాందేడ్ జిల్లా ధర్మాబాద్ సమీపంలో బాబ్లీ ప్రాజెక్ట్ నిర్మాణంపై చంద్రబాబు నిరసన. అరెస్ట్ చేసిన మహారాష్ట్ర పోలీసులు. తొలిసారి జైలుకు వెళ్లిన చంద్రబాబు.
- 2010 డిసెంబర్ 20 – అన్నదాత కోసం 8 రోజుల నిరాహార దీక్ష. అరెస్టు చేసి బలవంతంగా నిమ్స్ కు తరలించిన పోలీసులు.
- 2011 డిసెంబర్ – 17 జిల్లాల్లో రైతు పోరుబాట యాత్ర.
- 2012 అక్టోబర్ 2 – అనంతపురం జిల్లా, హిందూపురం నుండి చంద్రబాబు ‘వస్తున్నా మీకోసం’ పాదయాత్ర ప్రారంభం. 63 సంవత్సరాల వయసులో 208 రోజుల పాటు నాటి ఉమ్మడి రాష్ట్రంలో 16 జిల్లాలు, 86 అసెంబ్లీ నియోజకవర్గాలు, 162 మండలాలు, 28 మున్సిపాలిటీలు, 5 కార్పొరేషన్లు, 1289 గ్రామాల గుండా 2,817 కిలోమీటర్లు నడిచారు.
- 2013 ఏప్రిల్ 27న విశాఖలో పాదయాత్ర ముగింపు.
- 2013 జూన్ 24 – ఉత్తరాఖండ్ వరదల్లో చిక్కుకున్న 190 తెలుగువారికి సహాయం కోసం ప్రత్యేక విమానం.. హైదరాబాదులోని ఎన్టీఆర్(NTR) ట్రస్ట్ భవన్‌లో కాల్ సెంటర్ ఏర్పాటు.
- 2013 సెప్టెంబర్ 1 – విభజన ప్రకటన సందర్భంగా గుంటూరు జిల్లా, దాచేపల్లి మండలంలోని పొందుగల నుంచి బస్సులో ‘తెలుగుజాతి ఆత్మగౌరవ యాత్ర’ మొదటిదశ ప్రారంభం.
- 2013 అక్టోబర్ 7 అసంబద్ధ రాష్ట్ర విభజన తగదంటూ ఢిల్లీలో నిరాహార దీక్ష.
- 2013 నవంబర్ 21 రెండో విడత ‘ఆత్మగౌరవ యాత్ర’ ప్రారంభం.
నవ్యాంధ్ర ముఖ్యమంత్రిగా నవ్యపథం :
- 2014 జూన్ 8 – గుంటూరు సమీపంలోని ఆచార్య నాగార్జున విశ్వవిద్యాలయం మైదానంలో నవ్యాంధ్ర ముఖ్యమంత్రిగా ప్రమాణ స్వీకారం. ఐదు ఫైళ్లపై 5 సంతకాలు. రైతు రుణమాఫీ పై తొలి సంతకం
- 2014 సెప్టెంబరు 3 – రాజధాని ప్రాంతాన్ని నిర్ణయిస్తూ శాసనసభ తీర్మానం
- 2014 అక్టోబర్ 2 – రూ.200 నుండి రూ.1000కి ఐదు రెట్లు పెరిగిన పింఛను పంపిణీ ప్రారంభం
- 2014 డిసెంబర్ 10 – చారిత్రక రైతు రుణమాఫీ పథకం అమలు
- 2014 డిసెంబరు 23 – ఏపీ సీఆర్‌డీఏ చట్టాన్ని ఆమోదించిన శాసనసభ
- 2015 మార్చి 30 – దేశంలో మొదటి నదుల అనుసంధాన ప్రాజెక్టు ‘పట్టిసీమ ఎత్తిపోతల ప్రాజెక్టు’కు శంకుస్థాపన
- 2015 మే డే – అసంఘటిత కార్మికులకు ప్రమాద బీమా పథకం
- 2015 సెప్టెంబర్ 17 – కృష్ణా – గోదావరి నదుల పవిత్ర సంగమం
- 2015 అక్టోబరు 22 మధ్యాహ్నం 12.35 – 12.43 గంటల మధ్య – అత్యంత వైభవోపేతంగా, శాస్త్రోక్తంగా, వేదపండితుల మంత్రోచ్ఛారణల నడుమ… ప్రధాని నరేంద్ర మోడీ సమక్షంలో ప్రజా రాజధాని అమరావతి శంకుస్థాపన కార్యక్రమం.
- 2016 జనవరి 30 – పూణే ఆధారిత సంస్థ భారతీయ ఛాత్ర సంసద్ వారిచే “ఆదర్శ ముఖ్యమంత్రి పురస్కారం”.
- 2016 మార్చి 29 – పట్టిసీమ ఎత్తిపోతల ప్రారంభం. ఏడాదిలో పూర్తి ఒక రికార్డు
- 2016 ఏప్రిల్ 25 – వెలగపూడి సచివాలయం ప్రారంభం
- 2016 జూన్ 6 – సీడ్‌ యాక్సెస్‌ రోడ్డు నిర్మాణానికి శంకుస్థాపన. రాజధాని నిర్మాణానికి భూములిచ్చిన రైతులకు లాటరీ ద్వారా స్థలాల కేటాయింపు ప్రక్రియ నేలపాడు గ్రామంతో ప్రారంభం.
- 2016 అక్టోబర్ 12 – ఏపీ సచివాలయం నుంచి పని ప్రారంభం. డ్వాక్రా రుణమాఫీ పై తొలిసంతకం
- 2016 అక్టోబరు 28 – పరిపాలన నగరానికి అప్పటి కేంద్ర ఆర్థిక మంత్రి అరుణ్‌జైట్లీ శంకుస్థాపన
- 2017 మార్చి 2 – వెలగపూడిలో అసెంబ్లీ భవనాన్ని ప్రారంభించిన అప్పటి ముఖ్యమంత్రి చంద్రబాబు
- 2017 మే – చంద్రబాబుకు “ట్రాన్స్‌ఫార్మాటివ్ ఛీఫ్ మినిస్టర్ అవార్డు”.
- 2018 ఫిబ్రవరి 2 – కియా ఇన్‌స్టలేషన్ వర్క్‌కు శంకుస్థాపన
- 2018 సెప్టెంబర్ 12 – చరిత్రాత్మక పోలవరం గ్యాలరీ వాక్
- 2019 జనవరి – 54 లక్షల మందికి పింఛను రూ.1000 నుంచి రూ.2000లకు పెంపు
- 2019 జనవరి 7 – మొత్తం 32,315 క్యూబిక్‌ మీటర్ల కాంక్రీట్‌ పనులను 24 గంటల్లో పూర్తి చేసి రెండు గిన్నిస్‌ బుక్ ఆఫ్ రికార్డులను నమోదు చేసిన పోలవరం
- 2019 జనవరి 29 – కియా కార్ల పరిశ్రమ వారి ‘ట్రయల్ ప్రొడక్షన్’ కార్యక్రమం
- 2019 ఫిబ్రవరి 3 – హైకోర్టు ఐకానిక్‌ భవన నిర్మాణానికి శంకుస్థాపన. జ్యుడీషియల్‌ కాంప్లెక్స్ (ప్రస్తుత హైకోర్టు) ప్రారంభోత్సవం.
- 2019 ఫిబ్రవరి 11 – ఏపీకి ప్రత్యేక హోదా మరియు విభజన హామీల అమలు పై కేంద్రానికి వ్యతిరేకంగా ‘ధర్మ పోరాట దీక్ష’.
నారా చంద్రబాబు నాయుడు హయాంలో..తెలంగాణలో ప్రగతికి పునాదులు వేసిన తెలుగుదేశం
- తన విజన్ 2020 ఆలోచనలకు చంద్రబాబు ఇచ్చిన తొలిరూపమే సైబరాబాద్. అప్పటివరకు హైదరాబాద్, సికింద్రాబాద్ అనే జంట నగరాల సరసన అత్యాధునిక అభివృద్ధికి ప్రతీకగా నిలిచింది సైబరాబాద్.
- ఐటీ రంగంతో పాటు నానక్ రామ్ గూడలో లక్షల మందికి ఉపాధిని ఇస్తోన్న అద్భుతమైన ఆర్థిక నగరం ఏర్పాటుకు కృషి చేసింది తెలుగుదేశం ప్రభుత్వమే.
- అలాగే బీమా రంగం. నాడు చంద్రబాబు నాయుడు పట్టుబట్టి ఇన్సూరెన్స్ రెగ్యులేటరీ అధారిటీ (ఐఆర్డీఏ) అనే కేంద్ర సంస్థను, హైదరాబాద్ నగరానికి తీసుకుని రావడంతో.. బీమా సంస్థలు నగరానికి వరుసగట్టాయి.
- హైదరాబాద్ ను బయోటెక్ హబ్ గా చేయటంలో కూడా చంద్రబాబు కృషి మర్చిపోలేనిది. శామీర్ పేట ప్రాంతంలో నెలకొన్న బయోటెక్ సంస్థలే ఇందుకు నిదర్శనం. ప్రపంచానికి కొవాగ్జిన్ వాక్సిన్ ను అందించి కరోనాకు అడ్డుకట్ట వేసి భారతదేశం గర్వించేలా చేసిన భారత్ బయో టెక్.. నాడు చంద్రబాబు నెలకొల్పిన జీనోమ్ వ్యాలీలోనే ఉంది
- హైదరాబాద్ లో రద్దీ రోడ్లపై ట్రాఫిక్ కష్టాలకు చెక్ పెడుతూ నగరంలో 19 ఫ్లై ఓవర్లు నిర్మించారు చంద్రబాబు.
- గచ్చిబౌలి స్పోర్ట్స్ కాంప్లెక్స్, కోట్ల విజయ భాస్కరరెడ్డి స్టేడియం.. సరూర్ నగర్ స్టేడియం.. వంటి అనేక క్రీడా ప్రాంగణాలను నిర్మించి.. 2002లో 32వ నేషనల్ గేమ్స్, 2003లో మొదటి ఆఫ్రో-ఆసియన్ గేమ్స్ ను హైదరాబాదులో నిర్వహించి నగరానికి క్రీడా రాజధానిగా అంతర్జాతీయ ఖ్యాతి తెచ్చారు.
- పుల్లెల గోపీచంద్ బ్యాడ్మింటన్ అకాడమీకి చంద్రబాబు స్థలమిచ్చి, ప్రోత్సహించి పీవీ సింధు వంటి క్రీడాకారులు దేశానికి పతకాలు తెచ్చేందుకు కారణమయ్యారు
- బిల్ గేట్స్, బిల్ క్లింటన్, టోనీ బ్లెయిర్ వంటి ప్రపంచ ప్రఖ్యాతులను హైదరాబాద్ కు రప్పించి, ప్రపంచ పటంపై హైదరాబాద్ కు గుర్తింపు తెచ్చారు.
- మైక్రోసాఫ్ట్, విప్రో, ఐ ఎస్ బి, ట్రిపుల్ ఐటి, నల్సార్ లాంటి సంస్థలు హైదరాబాద్ కు రావటం వెనుక చంద్రబాబు పడిన శ్రమ అనితరసాధ్యం.
- పచ్చదనం-పరిశుభ్రత అంటూ హైదరాబాద్ ను ఆహ్లాదకర నగరంగా తీర్చిదిద్దారు. నగర ప్రజల కోసం శిల్పారామం వంటి ఆహ్లాదకర విహార కేంద్రాన్ని నెలకొల్పారు.
- నెక్లెస్ రోడ్, ఎన్టీఆర్ గార్డెన్స్, జలగం వెంగళరావు పార్క్, KBR పార్క్, కృష్ణకాంత్ పార్క్, సంజీవయ్య పార్క్, జలవిహర్ వంటివి ఈరోజు ప్రజలకు ఆహ్లాదాన్ని పంచుతున్నాయంటే అది తెలుగుదేశం పాలన ఫలితమే
తెలుగుదేశం హయాంలో తెలంగాణ లో ఏర్పాటైన మరికొన్ని సంస్థలు:
- ఈశ్వరీయ బ్రహ్మకుమారి విశ్వవిద్యాలయం
- మౌలానా ఆజాద్ ఉర్దూ యూనివర్సిటీ..
- IIIT
- టెలికాం రెగ్యులేటరీ అధారిటీ
- నేషనల్ అకాడమీ ఆఫ్ కన్స్ట్రక్షన్
- నేషనల్ ఇన్స్టిట్యూట్ ఆఫ్ ఫ్యాషన్ టెక్నాలజీ
- ఇండియన్ స్కూల్ ఆఫ్ బిజినెస్
- ఫైనాన్సియల్ డిస్ట్రిక్ట్
- మైక్రోసాఫ్ట్..ఇన్ఫోసిస్..విప్రో..ఫ్రాంక్లిన్ టెంపుల్టన్, ఇన్ఫోటెక్, కాన్ బే… వంటి ఎన్నో సాఫ్ట్ వేర్ సంస్థలు
- ఐసీఐసీఐ నాలెడ్జ్ పార్క్
- రహేజా మైండ్ స్పేస్
- మర్రి చెన్నారెడ్డి మానవ వనరుల అభివృద్ధి సంస్థ
- నల్సార్ యూనివర్సిటీ
- గాంధీ హాస్పిటల్ ఆధునికీకరణ
- చర్లపల్లి జైలు
- మలేషియన్ టౌన్ షిప్…సింగపూర్ టౌన్ షిప్
- పోచారం ఐటి జోన్
- కృష్ణా మంచినీటి పథకం
- ఈ-సేవా కేంద్రాలు.
Biography of Sri Nara Chandrababu Naidu-2024 # Biography of Sri Nara Chandrababu Naidu-2024
Biography of Sri Nara Chandrababu Naidu-2024 CBN #Biography of Sri Nara Chandrababu Naidu-2024 CBN
1 thought on “శ్రీ నారా చంద్రబాబు నాయుడు గారి జీవిత చరిత్ర | Biography of Sri Nara Chandrababu Naidu-2024”